ترجمة: Au Ber Gine
المصدر الأصلي: الفصل الخامس (The Dairy Disaster) من كتاب Skinny Bitch
هو انت مش اتفطمت يا ابني؟
بجد يعني مش ماما فطمتك من زمان؟ طب إيه؟ لما الست بتولد جسمها بيفرز اللبن علشان ترضع البيبي. لبم الأم بيخلي رضيع وزن ٤ كيلو يكبر ويبقى طفل ١٠ كيلو. تخن، صح؟ اللبن ده متصمم علشان يسمح بأكبر مرحلة نمو في حياة البني آدم، اللبن ده لوحده قادر انه يزود الوزن بنسبة ٣٠٠٪ على مدى ١٢ شهر. لما الطفل بيبقى بين ١٢ و٢٤ شهر الأم بتوقف الرضاعة. اللبن بينشف، والطفل عمره مابيرضع لبن أمه تاني.الأبقار زيها زي الثدييات كلها، عكس ما احنا فاهمين انهم لازم يتحلبوا طول الوقت، حتى الضرع شبه بيختفي لو البقره مش مخلفه. الفرق الأساسي بين لبن أمهاتنا البشر وأمهاتنا البقر إن لبن البقرة متصمم علشان عجل صغنن وزن ٤٠ كيلو يتحول لبقرة وزن ألف كيلو خلال سنتين اتنين، وبيخلي العجول توصل لضعف وزنها عند الولادة في ٤٧ يوم بس. طبيعي على كده إن لبن الأبقار يكون بيتخن؟
طبعاً لأن البقر أضخم من البشر في العادي، وأجسامهم من جوه مختلفه عننا تماماً. عادي برضه والله.
الثدييات بتحتاج إنزيم اللاكتاز Lactase علشان تهضم اللاكتوز Lactose (السكر الموجود في اللبن) بس بين سن ١٨ شهر ل٤ سنين إحنا بنفقد أكتر من ٩٠٪ من الإنزيم ده. اللاكتوز اللي مابيتهضمش والطبيعة الحمضيه للبن المبستر بتشجع نمو البكتيريا في أمعائنا، وكل ده بيسبب ارتفاع احتمال السرطان لأن السرطان بيهيص في الوسط الحمضي.
بتعاني من البلغم؟
منتجات الألبان بتنتج مخاط وأحياناً الجسم بيصاب ببرد أو حساسية علشان يحارب غزو منتجات الألبان.كل الكائنات بما فيهم إحنا عندهم بالضبط اللي يكفيهم بالكمية المناسبة. يعني ماتتريقش على إرضاع الكبير وبعدين تروح تشرب لبن بقري أو جاموسي. إحنا الكائن الوحيد اللي بيشرب لبن وهو شحط كده، الحيوانات بعد ما بتتفطم مابتفكرش ترضع تاني. اشمعنى احنا؟؟ مش بس بنشرب لبن، لأ وكمان مش اللبن بتاعنا ده بتاع البيبيهات التانيه!
طب اشمعنى لبن البقر والجاموس؟ ليه مابنشربش الشاي بلبن فيل أو زرافة؟ لأن البقرة هي أكتر حيوان منتج للحليب وفي نفس الوقت يسهل تدجينه، وده طبعاً معناه دخل أكبر لمنتجي الألبان. ماتستهونش بالجزئية دي، منتجات الألبان من الصناعات اللي بتدر مليارات معتمدة على الدعاية المكثفة والتعود لدرجة الإدمان على طعم الحليب والزبدة والجبنة. الدعاية اللي قدرت تقنع الأطباء والمستهلكين والحكومات إننا 'محتاجين' حليب الأبقار. من غير الحليب، عضمك هيضعف، وهيجيلك هشاشة، علشان الكالسيوم.
هراء. لا حقيقي هراء.
مفاجأة: اللبن يسبّب هشاشة العظام, مش العكس!
الباحثين في جامعات هارڤارد، ييل، پين ستيت، والمعهد القومي الأمريكي للصحة عملوا دراسات على تأثير منتجات الألبان على العظام. ولا دراسة واحدة من دول أثبتت علاقة منتجات الألبان بالهشاشة. بالعكس، فيه دراسة عملها المجلس القومي لمنتجات الألبان نفسه أثبتت إن البروتين العالي في الألبان بيتسبب في فقد الكالسيوم من الجسم. بالنظر إلى ٣٤ دراسة اتنشرت في ١٦ دولة، جامعة ييل لقت إن الدول اللي عندها أكبر نسبة هشاشة بما فيهم أمريكاوالسويد و فنلندا هما أكتر ناس بتستهلك اللحوم والألبان والمنتجات الحيوانية. في دراسة أخرى كشفت عن إن ٤٠ مليون ست أمريكية عندهم هشاشة بينما ٢٥٠ ألف ست أفريقية بس هما اللي بيعانوا من مشاكل في العظام.منتجات الألبان ارتبطت كمان بأمراض تانيه زي القرحة، الأنيميا، التوتر، ADD قلة الانتباه (العيال كلها عندها البتاع ده دلوقتي) هو والADHD قلة الانتباه مع فرط الحركة، التهاب الأعصاب، الصداع، الحموضة، عسر الهضم، آلام المفاصل، ضعف المناعة، البدانة، أمراض القلب، السكر، التوحد(!) موض كرون، سرطان الثدي والبروستاتا.
هارڤي وماريلين دايموند، مؤلفي كتاب Fit for Life بيقولوا صراحة إن منتجات الألبان مضرة صحياً، وإن 'خبراء التغذية' اللي بيدعوا إن الألبان قيمتها الغذائية عالية المفروض يتكسفوا من نفسهم لأنهم بيضللوا الناس اللي وثقوا فيهم بصفتهم خبراء في المجال.
أيوه، المفاجأة إنه معروف في أوساط الأبحاث الطبية إن الألبان ضارة بالصحة. وأصحاب صناعة الألبان هما كمان عارفين علشان كده بيصرفوا مليارات كل سنه عالدعاية 'الصحية' لمنتجاتهم لأنهم متأكدين انك هاتشوف الدعاية بتاعتهم بس مش هتحاول تقرا بحث في مجلة علمية عن أضرار الألبان.
طب والأطباء؟ للأسف أغلب الأطباء ميعرفوش حاجات كتير عن التغذية، وانضحك عليهم زينا لأنهم ما اتدربوش كفاية في المجال الغذائي.
طيب ولنفرض ان كل ده كلام فارغ وإن حليب الأبقار مفيد. على مايطلع من المصنع مش هيكون مفيد خالص. أحد المواد اللي بتتواجد بكثرة في الألبان هو الدايوكسين، وهي على حظك برضه أحد أخطر السموم في العالم.
علشان يزودوا إنتاج البقر من الحليب مش بيدلعوه ويهشتكوه زي ما الإعلانات العبقرية بتاعتنا مابتقول، دول بيدوهم مضادات حيوية وستيرويدز وهرمونات وبيأكلوهم أكل عليه مبيدات. وكل ده هيوصل لك من الحليب أكتر من لو أكلت لحوم الأبقار دي ذات نفسها. الأبقار بتتحقن بالبوڤين هرمون النمو، علشان ضروعهم اللي في العادي بتوفر خمسة كيلو حليب في اليوم، أصحاب المزارع الطماعين بيخلوها تنتج عشر أضعاف الرقم ده! ماتتخيلش مزارع كيوت قاعد جنب البقرة بسطل وبيحلبها بحنان، الأبقار بتتحلب بالماكينات، تخيل المقابض الحديد وهي بتقفل على ضرع البقر زي الكلابش كل يوم وطول اليوم. البديهي إن الجلد الحساس بتاع الضرع يلتهب، ويكون صديد. هل المكن هيقف علشان البقر جاله صديد؟ أكيد لأ طبعاً لأنه مكن هيستمر في حلب الحليب مع الصديد. وعلشان كده الحليب اللي بتشربه لازم يتبستر علشان يتخلص من كل البكتيريا والبلاوي الزرقا اللي فيه. البستره بقى بتدمر شوية الإنزيمات المفيدة اللي فيه وبتقلل محتوى الكالسيوم وياريت حتى بيقضوا عالبكتيريا تماما!
الحليب مش مصدر مهم للمعادن. بالعكس هتلاقي نسب أعلى من المنجنيز والكروميم والسيلينيم والماجنيزيم في الخضار والفاكهة، اللي فيهم كمان بورون boron اللي بيساعد على تقليل الكالسيوم اللي بنفقده في البول. استهلاك منتجات الألبان بيعوق امتصاص الحديد، متسبباً في الأنيميا.
طب هانجيب الكالسيوم منين؟
من الأطعمة دي: الحبوب، القرنبيط، الكرنب، الحمص، البروكولي، الفاصوليا الحمرا، حبوب الصويا، التوفو والمكسرات والسمسم. وماتعتمدش على حبوب الكالسيوم كمكمل غذائي لأنها تأثيرها ضعيف. وبعدين خايف على عضمك؟ خمستاشر دقيقة في الشمس كل يوم هتساعد على امتصاص ڤيتامين D يعني عظام قوية.طب والبيض؟
البيض اللي بناكله النهارده اللي جاي من المزرعة جايب لنا معاه كل الهرمونات والمبيدات والكيماويات والستيرويدز اللي دخلت جسم ماما فرخة كأنك بتاكلها هي شخصياً. حتى لو انت ناصح وجايب بيض بلدي من فرخة بلدي بنت أصول، أصلاً البيض كله دهون مشبعة وبيتخن! ولو مصر تبقى ناصح وتاكل البياض بس، أنصحك تفكر في اللي بتاكله ده، عبارة عن إيه؟ يعني البياض ده قبل مايتسلق كان إيه؟ ايييييوه، المية اللي بيعوم فيها الكتكوت وهو جنين يا مقرف.لو عرفت أد إيه هاتخس لو بطلت منتجات الألبان مش هاتصدق. الدهون هي اللي بتخلي طعم الجبنة لذيذ. ٧٠ ل٨٠ ٪ من السعرات اللي بتيجي من الجبنة بتكون دهون. ماتصدقش حوار الskimmed والfat free ده كله نصب. ربنا خلق حليب الأبقار لسبب واحد: تسمين العجول، طب لما يخلوه من الدهون هيفضل منه إيه؟ منقوع حليب؟ حليب=دهون. زبدة=دهون. جبنة=دهون. الناس اللي فاكرة ان فيه منتجات ألبان خالية الدسم=أوسكار أغبى كائن حي.
النهارده فيه بدائل كتير لمنتجات الألبان، في السوبرماركت وحتى الكافيهات بيقدموا حليب صويا، وبعض المخابز بتعمل مخبوزات خالية من البيض والحليب. بس وانت بتشتري بدائل الحليب افتكر تبص عالمكونات: ابعد عن المنتجات اللي فيها سكر.
دوروا على وصفات توفو مبتكرة لو وحشكم البيض المقلي.
تصبحوا على خير نباتي.